الباب البجيب الريح

عشــانك يا.."ســوســو"...انا كنت شيوعـــي:-

د.عادل الصادق المكي- المخستكاتي

يسقط كارل ماركس.....يسقط لينين.....يسقط خروتشوف....يسقط كمال ترباس......تسقط البعبدا كمان ان ما عجبكم....يسقط العريس ابتلاليش الذي عامل فيها قيافة....وهو لا قيافة ولا حاجة....تسقط ام العريس حتى لو كانت حردانة العرس....كل هذه الهتفات وغيرها.... اطلقتها في ليلة عرس سوسو....سوسو كانت دنقلاوية.... شيوعية.....عشان اقرب منهاحاولت اتقلب دنقلاوي... لكن ما قدرت....لقيت اسهل حاجة اتقلب شيوعي....اسهل عليّ ان اتشيّع من ان اتدنقل....جبت اي كتاب علي ضهر الدنيا دي يعلمني الشيوعية...حفضت النضم الفيهو صم...حتى لو كنت ما فاهمو ودا الاغلب.....قطعت وهردت بنطلوني حق الجنز...ووزعت باقي هديماتي للطبقة العاملة من الكادحين والمسحوقين.. والمدروشين.....و..بقيت اقيف تحت عمود الكهرباء الفي راس الشارع....نص النهار..في الشمش وفي الهجيرة....اقيف خاتي كراع فوق العمود والتانية في الواطا......وضهري تاكلو علي العمود.....وانا اتأمل هذا العالم...النتن الذي تحكمه الراسمالية والبرجوازية المتعفنة....كجنت البرجوازي مرسال المكوجي.....والانتهازي الامبريالي عبد الرحمن سيد الدكان...وازدت غيظ لما شفتو لابس شبط جديد....شبطو الذي اشتراهو من عرق المسحوقين والكادحين....وكان بيبع حبيبات الفول بالغالي من الدراهم....وكان يحتكر السكر والزيت... يحتكر قوت الشعب.....كجنت البرجوازيه حليمة بائعة اللبن.....وكجنت الراسمالي سمساعة سيد الكارو.. وكجنت حصانو....لانه كان يمثل قمة الاقطاع....وخصوصا وهو يلولح سوطو بكبرياء وعنجهية الاقطاعي القبيح.....كجنت خالتو سكينة....المشاطة... البرجوازية المتسلقة....التي كانت تخت البنبر فوق العنقريب وتتسلق البنبر وتقعد فوقو...والمرا المسحوقة الدايرة تتمشط تقعد تحت كرعين المشاطة...البرجوازية الاستعلائية.....كجنت وصبيت جام غضبي علي سعدية الوداعية.... ماعارف ليه اجد بها وجه شبه بينها وبين راسبوتين؟؟ راسبوتين ذلك الدجال الذي كان يحكم الشعب الروسي من خلال القيصر......ونسوان القيصر......
كل هذا الكره وهذه الكجنة... للعالم الراسمالي وللبرجوازية....والعالم الرجعي.... عشان سوسو.. وعيون سوسو... وخدود سوسو....احببت الرفقية سوسو..... واتفقنا على الزواج الايدلوجي....البعيد عن الشهوات...زواج من اجل الكادحين والبسطاء....احببت الرفيقة ست النفر ام سوسو..... والرفيقة ستنا حبوبة سوسو... وكنت اناديها ب يا رفيقة... فكانت ترد علي "يرافقك الكلب"....واحببت الرفيق الكلب...
ولكن ذهبت احلامي ادراج الرياح....عندما غدرت سوسو بالحزب...وتزوجت من راسمالي حقير....دمرت احلامي... الحب.. الزواج..... الوليدات ابان مخاخيت....اطفال الايدلوجية المشتركة....كلو دا اضحى سراب......
قررت وانا في قمة حقدي الطبقي....قررت ان اطرشق وافرتق حفلة عرس سوسو....ولكن بطريقة ثورية بلشفية مبتكرة....هتافات ومظاهرات في نص خيمة العرس...جمعت كل الرفقاء رفقاء البشتنة... والحانقين علي الشيوعية المرتدة سوسو.....تحت عمود الكهرباء....واصر الرفيق..علي المسمى بكاسترو.....ان يقطع يدو ويكتب لافتة بدمه الطاهر...ويكتب علي قطعة قماش..... يكتب" عاش كفاح الطبقة الهاملة".... تقدمت جموع الشيوعين الهادرة... ناحية خيمة عرس الخائنة سوسو.....ونحن نردد الهتافات الموجهة ضد الامبريالية والرجعية المتمثلة في العريس والعروس...كنت انا اهتف والجموع تردد من خلفي........:-

يسقط ماركس.... يسقط لينين... يسقط العريس ابتلاليش....

وكانت هناك هتافات رجزيه..... اقول الشطر الاول ثم تردده الجموع الهادرة....ثم اقول الشطر الثاني وتردده الجماهير الثائرة......وكانت الهتافات :-
يا عريس ... يا.. جنينة

الله يكسرني.... عروسك .. شينة

يا عروس يا ام قدوم
شوفي عريسك....كلو..جضوم

غايتو جنس حساده -

الحاسد عمرو ما بيمشي لي قدام.... نضم كان بيقولو لي جد لي....والبيحفر بينزل والبيبني بيطلع... يعني الزول الحاسد وبيحفر للزول الحاسدو عشان يضيعو... بينزل تحت.. والزول البيبني طوالي بيكون ماشي لي فوق...الحسادة هي ان تتمنى ان تزول نعمة اي زول او ما يراه الحاسد انها نعمة...تزول وخلاص.. ويكون هو مبسوط... وممكن جدا بكل بساطة يقول انشاء الله ربنا يدينا زيو.... ونبقى زيو...لكن لا يكون ما داير يبقى زيو ودايرو هو يبقى كعب....وبعدين الزول الخاسد اصلو ما بيفكر في انو يهتم بي نفسو ويطور نفسو... بيكون همو كلو...كيف نعمة الناس تروح.... عشان كدي تلقاهو طوالي مبشتن...ومضايق وما مرتاح نفسيا... عثمان ماشا الله مشهور بالحسادة..... يشوف الشي عندك ويقول ما شاء الله وفي سرو يقول ( انشاء الله ما تنفعك وتدخل عليك بالساحق والماحق)...لو شافك شايل بتيخة ساكت يتمنى من جوا قلبو انها تطلع بيضا و مسيخة..وانت ووليداتك خشمكم يبقى ملح ملح... وينتظر النتيحة ويربط لي ولدك الصغير ولما يشوفو يناديهو ويسالو( يا جنا قطعتو البتيخة؟)... يقول لو ( ايوا ..لكن طلعت بيضا وكعبة) يرتاح عثمان وتلقاهو مشي ويغني.. حاج احمد لمت فيهو ملاريا.... كان عثمان بيجيهو ما عشان يزورو ويشوف المراريا سوت عليهو كيفن؟ بيزورو عشان يحسدو في كبابي الشربات القاعدين يدوها ليهو.... (حاج احمد..والله المراريا عندك..... الشربات طوااااالي ما شاء الله ... غايتو كباية داخلة وكباية مراقة.... اريتا مرارية السرور)..... مات حاج احمد ودخل عثمان من ضمن من يغسلو الجنازة....اول ما شافو راقد وميت(غايتو يا حاج احمد ما شاء الله حتى رقدتك في الموت رقدة زول مرطب....عليك الله عان الموتة دي؟ تقول نائم... و الغريبة صلعة ما عندو ،الشعر اسود ولا شعرة بيضا مافي، زول عمرو قريب السبعين سنة وشعرو اسود كدي... البيخليهو يشيب شنو؟ عمرو ما ضاق زنقة دنيا...نشيب نحن المشلهتين ديل..بعدين شوف الجضوم دي؟ ما شاء الله... نان ديمة ياكل في الشية.... شوف الكرعين ديل ملووووس كيفن؟..نان الما بيلخيهن ملوس شنو؟.. ما دام من خشم باب البيت للعربية ومن خشم باب الدكان للعربية... الواطا دي اصلن ما بيضوقنها.....وشوف اللون دا رايق كيفن؟.... نان المكيفات اوووووووف فوق راسو من تشرق الشمش لمن تشرق تاني) ويبدا يطنطن في سرو. وهو يغسل فيهو...(يا ربي الزول دا بيدخل الجنة؟... غايتو ان دخل الجنة المغصة بتقتلني)......

عشان النسوان ما يزعلن:-

لبست يوم عقد راجلها.....قبال العقد..... بربع ساعة
دخلت على زوجته الجديدة..... سلمت عليها... وقالت لها اديني اضانك.... غامرت وادتا اضانا..... قالت لها نضم في اضانا........ العروس قلبت وشيها وكوركت لاخوها .....وقالت لو" اجري الحق الرجال في الجامع ما يعقدو، الزول دا ما دايراهو ما دايراهو ما دايراهو..... ان بقى اخر الرجال"
الي الان ما معروف قالت لها شنو؟؟؟؟؟؟

انا غايتو عارف لكن عشان الدعم اللوجستيي للنسوان اصلو ما بحدسكم.....

كـــــــــــــــــــــــلاب حول الرئيس:-

هناك حيوانات عندها حظ في الدنيا دي...اكتر من شفع المايقوما...واكتر من شفع المايقعدة.... واكتر من ناس حايمة في السهلة دي..... والواحد قاعد جنب ستات الشاي وينضم في الكورة وفي السياسة. وتسمعو تقول حسي يقلبا.. وفي الغنا.... وفي اي حاجة ولما يقوم من ست الشاي يقول ليها( انتي دايرة مني كم؟)..تقول ليهو دايرة اربعة جنية.... يقول ليها ( اربعة جنية؟.....خلاس كدا يكونن خمسة جنية) ..وينفض صُلبو ويمشي......وهي تعاين ليهو وتنقنق.... لكن هو اضان جلد....لقيت اكتر الحيوانات حظوظا الكلاب في الدول الغربية... واكتر حظ منها كلاب الرويسا.... وخصوصا الامريكان.... الرئيس الامريكي لازمن يكون عندو كلب... اوباما عندو كلبين في البيت الابيض....نحن العرب اول ناس بنحترم الكلاب وبنفتكرها احسن من الخلفاء لما دخل الشاعر العربي علي الخليفة العباسي..وقال ليهو في قصيدة طويلة عريضة بداها بــ:-
أنت كالكلب في حفاظك للود
وكالتيس في قِراع الخطوب

.... يعني الامريكان بدو من حيث انتهينا نحن...اوباما قال داير كلب يكون هجين وما يسوي حساسية لي بنيتو... في اعلان رئاسي في مؤتمر صحفي...ناس بيرو ما صدقو... قالو ليهو عندنا ليك كلب من النوع الاصلع.. ودا ما عندو سنون.... يعني لا بيعضي ولا بيلوك..زول بلع ساااااااكت..... نسجلو ليك باسمك... وعليك امان الله...كان امريكا حاربت بيرو وصاطتا فوق تحت....ما بنقول دايرين كلبنا...وبهناك اسبانيا برضو عرضت عليهو كلب... كل الدنيا دي دايرة تدخل البيت الابيض على ضنب كلب...علا نحن..فلاحتنا نشاكل في امريكا ، حسي كان رسلنا جريو من الجريوات الكارنهن الشفع في الشوارع دي ما كنا اخترقنا البيت الابيض؟... ومدينا لسانا للامم المتحدة ومجلس الامن؟....نرسل الجريو ولا نشاور اوباما... وفتحتو لي خشم باب البيت الابيض نمسكو الجريو في ايدو ونحلف عليهو طلاق ما يرجع....كان ما لاقين زول يمشي انا كنت بمشي..واحشرو ليهو في جيبو....كلب اوباما الاختارو اسمو( بو).......وهو من فصيلة كلاب الماء البرتغالية....قصير اسود مشعف(شعرو كتير)... يا الله تشوف عيونو من الشعفة.. اضنيهو مدلدلات ديمة....هابش وشليق....متطلع وطموح... قاعد يقود الرئيس بدل ما الرئيس يقودو...اكتر من صورة وشوفتو قايد اوباما... تمنو الف وستمائة دولار(ثمانية مليون بالسوداني القديم والسعر الجاري للدولار)....اخر خبر ليهو انو الرئيس اشترى ليهو بسكويت بمتين دولار(مليون جنيه).... كاتب المقال من الله خلقو ولي يومكم دا مجموع البسكويت الاكلو في حياتو ما يجيب خمسين دولار(دا مع البوبار) علما بانني كنت محظوظا دونا عن اخداني بان تعرفت على البسكويت وانا في العاشرة من عمري..اما في ما قبل فكانت صلتي بالدوم والنبق صلة وثيقة، وفي دي اتحدى (بو) وعشرين( بو) زيو..... اما الكلب التاني فهو الكلب(ميكي)....وهو كلب مولود في هولندا ومتربي في اسرائيل وشغال حسي في امريكا(شفتو النعمة دي؟)...وهو كلب مدرب تدريب عالي على الحراسة ويعتبر من حراس الرئيس الامريكي..... اوباما يلملم في الكلاب في البيت اللبيض ومخلي حبوبتو في كينيا مسكينية الباعوضة تاكل فيها....